Bioqrafiya

Mən İsayev Ağasəmid Babasəmid oğlu 05 noyabr 1961-ci ildə Şamaxı rayonunun Ovculu kəndində anadan olmuşam. 1980-86-cı illərdə N.Nərimanov adına Azərbaycan Dövlət Tibb İnstitutunda təhsil almışam. 1986-cı ildə həmin institutu fərqlənmə diplomu (lenin təqaüdü) ilə bitirmişəm və Elmi Şuranın qərarı ilə “İnsan anatomiyası” kafedrasında baş laborant kimi əmək fəaliyyərinə başlamışam. 2009-cu ildə “Müxtəlif rejimli fiziki yük zamanı skelet və ürək əzələsi toxumasında baş verən morfo-funksional dəyişikliklərin müqayisəli cəhətdən qiymətləndirilməsi” mövzusunda doktorluq dissertasiyası işini müdafiə edərək tibb elmləri doktoru elmi dərəcəsinə layiq görülmüşəm. 2012-ci ildə ATU-nun böyük Elmi Şurasının qərarı ilə kafedranın professoru vəzifəsinə seçilmişəm. Azərbaycan Respublikasının Prezidenti yanında Ali Attestasiya Komissiyasının 9 yanvar 2015-ci il tarixli (protokol №01 - R) qərarı ilə mənə professor elmi adı verilib.

Periferik sisnir sisteminin makromikroskopik anatomiyası, ürək-damr sisteminin morfo-funksional anatomiyası və antropologiya sahəsində elmi fəaliyyətimi bu gün də aktiv surətdə davam etdirirəm. 150-dən artıq elmi əsərin, o cümlədən 2 tədris-metodiki vəsaitin, 10 dərs vəsaitinin, 15 dərsliyin və 1 monoqrafiyanın müəllifiyəm.

Elmi-pedaqoji fəaliyyətim dövründə I və II kurslarda təcrübə dərsləri və mühazirələr aparmışam. ATU-nun nəzdində fəaliyyət göstərən imtahan ekspert komissiyasının, FD 2.08 dissertasiya şurasının, HİK bürosunun, İlkin sənədlərin yoxlanılması komissiyasının və Dövlət İmtahan Mərkəzinin nəzdində fəaliyyət göstərən rezidentura şöbəsinin imtahan ekspert komissiyasının üzvü kimi fəaliyyət göstərmişəm. 2010-cu ildə Azərbaycan Respublikası Həmkarlar İttifaqı Konfederasiyasıinın, 2019-cu ildə isə Azərbaycan Tibb Universitetinin “Fəxri Fərmanı”na layiq görülmüşəm. 2015-ci ildə aktiv elmi fəaliyyətimə görə Avropa Təbiət Elmləri Akademiyasının həqiqi üzvü seçilmişəm.