Bioqrafiya

Sevda Ələsgər qızı Xəlilova 1957-ci ildə anadan olmuşdur. 1975-ci ildə N.Nərimanov adına Azərbaycan Tibb İnstitutuna daxil olmuş, 1982-ci ildə isə institutu bitirmişdir. 1985-1990-cı illərdə Bakı şəhəri, 21 saylı poliklinikada nevropatoloq kimi fəaliyyət göstərmişdir. 1990-1994-cü illərdə Respublika Peşə Patologiyası Mərkəzində həkim-ordinator (nevropatoloq) vəzifəsində çalışmışdır. 1994-1997-ci illərdə Milli Elmi Tədqiqat Tibbi Profilaktika İnstitutunun Əmək gigiyenası və peşə xəstəlikləri şöbəsində şöbə müdiri, 1997-2022-ci ilin əvvəllərinədək isə V.Axundov adına Elmi Tədqiqat Tibbi Profilaktika İnstitutunun Peşə xəstəlikləri klinikasında Baş həkim vəzifəsində çalışmışdır. 2022-ci ildən bugünək İnstitutun Peşə xəstəlikləri şöbəsində şöbə müdiri vəzifəsində çalışır.

1998-ci ildə Azərbaycan Respublikası Səhiyyə Nazirliyi , həmçinin həmin ildə ADNŞ tərəfindən “Təşəkkürnamə” almışdır. 2021-ci ildə TƏBİB tərəfindən“Fəxri Fərman”la təltif edilmişdir.

2000-ci ildə Azərbaycan Respublikası Səhiyyə Nazirliyinin Atestasiya Komissiyası tərəfindən “Ali dərəcəli həkim-təşkilatçı” statusu təsdiq edilmişdir.

2012-ci ilin iyun ayında “Civə katodlu elektroliz metodu ilə xlor və soda istehsalında işçilərin əməyinin gigiyenası və sinir sisteminin vəziyyəti” mövzusunda dissertasiya müdafiə etmiş (ixtisaslar;“Nevrologiya”, “Gigiyena”) və fəlsəfə doktoru elmi dərəcəsi verilmişdir.

Bu illər ərzində bir çox yerli və beynəlxalq konfranslarda iştirak etmişdir. O, son 2021-2023-cü illərdə isə bir sıra vebinarlarda iştirak etmiş , AMEA- nın Fizika-Riyaziyyat, Texnika Elmləri bölməsinin Ümumi yığıncağının keçirdiyi iclas, Azərbaycan Memarlıq və İnşaat Universiteti tərəfindən keçirilən “İşğaldan azad olunmüş ərazilərdə fövqəladə hal riskləri” mövzusunda Elmi-texniki Konfransda “Ekologi terror, insan ekologiyası və sağlamlıq” mövzusunda prezentasiya, AMEA-nın Radiasiya Problemləri İnstitutunun keçirdiyi konfranslarda çıxışlar, Ümummilli Lider Heydər Əliyevin anadan olmasının 100 illiyinə həsr olunmuş Beynəlxalq Elmi- praktiki konqres, İctimai Səhiyyə Konfransında “Peşə xəstəliklərinin epidemiologiyası və profilaktikası” mövzusunda prezentasiya etmişdir. Sevda Xəlilova 2 populyar tibbi kitabın, 1 monoqrafiya, 1 dərslik və 3 metodiki tövsiyyənin müəllifi və həmmüəllifidir. İnstitutun elmi konfranslarının toplusunda, yerli və xarici jurnallarda 30-dən çox məqalə və tezisləri çapdan çıxmışdır ki, bunlardan da 4 məqalə impakt faktorlu jurnallarda dərc edilmişdir (h-indeks).

Sevda Xəlilova “Azərbaycan Respublikasında qeyri infeksion xəstəliklərlə mübarizəyə dair 2015-2020-ci illər üçün Strategiya”nın institut üzrə görülən işlərə, aparılan seminarlara və hazirlanan təkliflərə cavabdeh şəxs təyin edilmişdir. “Demoqrafiya”, “Ekologiya və sağlamlıq” Dövlət Proqramlarında işçi qrupun tərkibində rəy və təkliflər hazırlamışdır. Qəbələ RLS-da elektromaqnit dalğalarının ətraf mühit, canlı aləm və insanlara təsirinin öyrənilməsi, ETSN və və Dünya bankının ətraf mühitin civədən təmizlənməsi və utilizasiyası üzrə aparılan tədqiqatlarda işçi qrupun tərkibində çalışmışdır. Sevda Xəlilova eyni zamanda BMT-nın 2 proyektində - “Minamata Konvensiyası”na qoşulmaqla bağlı və Stokholm Konvensiyasından irəli gələn öhdəliklərin yerinə yetirilməsi üçün “Ətraf mühiti çirkləndirən xlorüzvi birləşmələr”lə bağlı tədqiqatlarda ekspert kimi iştirak etmişdir.

Elmi və praktiki məlumatlarla bağlı televiziya kanallarında (AzTV və Spase telekanallarında), qəzetlərdə( Kaspi, Lent.az) və s.çıxışlar etmişdir.

Sevda Xəlilova institutda “Etik komissiya”nın sədr müavini seçilmişdir. 2022- 2023-cü tədris ilində isə ATU-nun “Gigiyena, Epidemiologiya, Mikrobiologiya və İnfeksion xəstəliklər” bölümü üzrə aprabasiya komissiyasının üzvü təyin edilmiş, həmçinin “Uşaq-yeniyetmələrin sağlamlığı və əmək sağlamlığı” kafedrasında “Təcrübədən tədrisə” layihəsi çərçivəsində çalışmışdır.

Bir sıra sənədlərdə əlavə və dəyişikliklərin aparılmasında iştirak etmişdir; ƏM, Nazirlər Kabinetinin Qərarları (1, 3, 7, 12, 27 və s.), SN-nin Qərarları (46, 24/2) və s.